Numru tas-Sigurtà Soċjali

Ħarsa ġenerali

Storikament in-numru tas-sigurtà soċjali tiegħek huwa (numru N.I.) huwa rreġistrat taħt l-Att dwar is-Sigurtà Soċjali (Kap. 318.). Jintuża biex tħallas il-kontribuzzjonijiet tas-sigurtà soċjali li jiġu mnaqqsa mis-salarju tiegħek jekk int impjegat/a jew billi tagħmel pagamenti mal-Kummissarju tad-Dħul f’każ li int taħdem għalik innifsek. Il-kontribuzzjonijiet tas-sigurtà soċjali mħallsa jagħtuk dritt għall-benefiċċji tas-sigurtà soċjali provduti taħt l-Att dwar is-Sigurtà Soċjali (KAP. 318.), soġġett għall-kundizzjonijiet ta’ intitolament li jeżistu għal kull tip ta’ benefiċċju. Tista’ ssib aktar informazzjoni dwar il-kategoriji u l-ammont ta’ kontribuzzjonijiet tas-sigurtà soċjali li l-impjegati u dawk li jaħdmu għal rashom/għalihom infushom iridu jħallsu, hawn.

Minn Ottubru tal-2016, in-numru ta’ reġistrazzjoni tas-sigurtà soċjali ma baqgħax joħroġ għall-persuni li għandhom fil-pussess tagħhom Karta tal-Identità permanenti Maltija (bl-ittri M, L, G, H) u joħroġ biss għall-persuni li għandhom il-Karta tal-Identità Maltija li tispiċċa bl-ittra ‘A’ u għal dawk li mhumiex fil-pussess ta’ Karta tal-Identità permanenti Maltija. Madankollu, dawk il-minuri li għadhom studenti taħt is-sittax-il (16) sena u għandhom Karta tal-Identità Maltija (14+) iżda jixtiequ jaħdmu fuq bażi temporanja, huma obbligati li jirreġistraw għal numru tas-sigurtà soċjali jekk l-aħħar sena skolastika obbligatorja ma tlestietx billi jattendu xi ċentru ta’ Jobsplus.

L-Att dwar is-Sigurtà Soċjali (Kap. 318.), jipprovdi li kull persuna li tkun f’impjieg assigurabbli Malti bejn l-età ta’ sittax (16) u ħamsa u sittin (65) sena għandha tkun assigurata, u dan jinkiseb awtomatikament meta l-persuna tħallas il-kontribuzzjonijiet tas-sigurtà soċjali f’Malta. Tali rekwiżit obbligatorju jagħmel lil kull persuna assigurata eliġibbli biex titlob u tirċievi benefiċċji kontributorji tas-sigurtà soċjali, inkluża pensjoni tal-irtirar, soġġetta li tissodisfa l-kundizzjonijiet minimi tal-benefiċċju.

Minn Lulju 2025, ġie introdott proċess ġdid ma’ Jobsplus, fejn persuna li tkun qed titlob Numru tas-Sigurtà Soċjali Malti trid tattendi fl-Aġenzija Jobsplus. Ladarba l-Formola ta’ Engagement tal-persuna tiġi rreġistrata ma’ Jobsplus, id-dettalji tagħha jiġu trasmessi awtomatikament b’mod diġitali lid-Dipartiment tas-Sigurtà Soċjali. Jekk tkun eliġibbli, jinħareġ Numru tas-Sigurtà Soċjali f’ħin reali.

Huma dawn il-persuni biss kif indikat hawn taħt. għandhom jirreġistraw permezz tal-applikazzjoni online li tivverifika l-validazzjoni tal-Karta tal-Identità Maltija u d-Data tat-Twelid tal-applikant, filwaqt li skont l-għażliet magħżula, tinħtieġ informazzjoni speċifika matul il-proċess kif xieraq. Irid ikun innotat li mhux ser ikun aktar permess li l-impjegaturi jibagħtu applikazzjonijiet online f’isem l-impjegati tagħhom. L-impjegati għandhom japplikaw huma f’isimhom stess billi jużaw waħda minn dawn il-metodi:

Il-kont personali tagħhom tal-e-ID, jekk għandhom karta tal-identità Maltija valida.
Il-kont eIDAS tagħhom, jekk huma ċittadini tal-UE.
Kont ta’ Reġistrazzjoni, jekk m’humiex ċittadini tal-UE.

Fil-qosor hawn taħt hawn il-passi li għandek issegwi biex tapplika għal Numru tas-Sigurtà Soċjali Malti:

Jekk inti minorenni bejn l-età ta’ 14 u 16-il sena, trid tattendi fiċ-ċentru ta’ Jobsplus.
Jekk għandek aktar minn 16-il sena u għandek numru tal-Karta tal-Identità Maltija li tispiċċa b’littri ‘M’, ‘G’, ‘L’, ‘H’ jew ‘A’, trid tattendi fiċ-ċentru ta’ Jobsplus.
Jekk inti membru ta’ Ekwipaġġ tal-Ajru, Baħri, Mariner, Trasportatur jew ċittadin f’Sitwazzjoni Transkonfinali tal-UE, trid tirreġistra permezz tal-applikazzjoni online u tawtentika bl-eIDAS.
Jekk inti ċittadin mhux Malti iżda ċittadin tal-Unjoni Ewropea li m’għandux Karta tal-Identità Maltija maħruġa mill-aġenzija tal-gvern Malti Identità u qed titlob li taħdem f’Malta, tista’ tirreġistra permezz tal-applikazzjoni online billi tawtentika bl-eIDAS jew tattendi f’xi ċentru ta’ Servizz.gov biex japplikaw f’ismek.
Jekk inti persuna minn Pajjiż Terż li qed titlob li taħdem Malta, trid jew tapplika online billi tawtentika billi tirreġistra għal Kont jew tattendi f’wieħed miċ-ċentri ta’ servizz.gov u japplikawlek f’ismek.
Jekk inti qed titlob ażil u trid taħdem f’Malta, trid tattendi personalment f’xi ċentru ta’ Servizz.gov biex japplikaw f’ismek.

Nota: L-applikazzjoni għal numru ta’ reġistrazzjoni għal skopijiet ta’ sigurtà soċjali ma jfissirx neċessarjament li inti tkun irreġistrat awtomatikament. Il-pożizzjoni tal-assikurazzjoni tiegħek trid tiġi determinata mid-Dipartiment tas-Sigurtà Soċjali.

X’se tingħata

Persuni li għandhom fil-pussess tagħhom Karta tal-Identità permanenti Maltija, ikunu awtomatikament reġistrati taħt l-Att tas-Sigurtà Soċjali (KAP. 318.) ladarba jkunu għalqu is-sittax-il (16) sena. Persuni li mhumiex fil-pussess ta’ Karta’ tal-Identità permanenti Maltija u li għandhom età bejn sittax-il (16) sena u l-età tal-pensjoni, iridu japplikaw għal numru ta’ reġistrazzjoni tas-sigurtà soċjali. Dan in-numru jinħareġ darba biss u huwa validu matul il-ħajja tal-applikant.

Dawk il-persuni li għandhom fil-pussess tagħhom Karta tal-Identità valida Maltija, jirċievu ċ-ċertifikat ta’ reġistrazzjoni awtomatikament ftit jiem qabel jagħlqu l-età ta’ sittax-il (16) sena.

Għal dawk li ma jkollhomx Karta tal-Identità Maltija permanenti u li jagħmlu użu minn din l-applikazzjoni online, iċ-ċertifikat ta’ reġistrazzjoni u n-numru tas-sigurtà soċjali jintbagħtu permezz tal-indirizz elettroniku pprovdut fl-applikazzjoni ladarba jintlaħqu l-kriterji tal-assigurazzjoni. Tali informazzjoni ma tiġix kondiviża ma’ partijiet terzi oħra sakemm ma tkunx koperta minn leġiżlazzjoni jew ftehim dwar il-kondiviżjoni tad-data.

Applikazzjoni tieħu madwar ġimagħtejn (2) sabiex tiġi ppoċessata jekk id-dokumenti mehmuża jkunu kif rikjesti.

Għal aktar informazzjoni dwar l-obbligi tal-Kontribuzzjonijiet tas-Sigurtà Soċjali ikklikkja hawn.

Eliġibbiltà

Kriterji ta’ eliġibbiltà:

Inti eliġibbli għall-ħruġ awtomatiku ta’ Numru tas-Sigurtà Soċjali (SSN) jekk:

Qiegħed tiġi impjegat permezz tal-Aġenzija Jobsplus u għandek id-dokumenti kollha meħtieġa f’idejk.
M’għandekx diġà Numru tas-Sigurtà Soċjali Malti.
Għandek mill-inqas erbatax-il (14) il sena. Madankollu, jekk għadek taħt is-16-il sena, Jobsplus irid jikkonferma l-eliġibbiltà tiegħek permezz ta’ eżenzjoni EDU mis-Servizzi Nazzjonali ta’ Appoġġ għall-Iskejjel.
Id-dettalji personali tiegħek, bħall-isem sħiħ, data tat-twelid, u n-nazzjonalità huma rreġistrati b’mod korrett mal-Aġenzija Identità.
Jekk l-impjieg tiegħek ma’ Jobsplus jinkludi numru validu ta’ Karta tal-Identità Maltija, trid tipprovdi indirizz elettroniku validu.
Jekk ma tipprovdix numru validu ta’ Karta tal-Identità Maltija, trid tipprovdi kemm indirizz elettroniku kif ukoll numru validu ta’ passaport. Dan jiżgura li tista’ tiġi kkuntattjat u gwidat dwar kif tikseb il-Karta tal-Identità Maltija. Ladarba l-Karta tal-Identità Maltija tiġi maħruġa u tgħaddi għand l-Aġenzija Jobsplus, it-talba tiġi sottomessa mill-ġdid u jinħareġ in-Numru tas-Sigurtà Soċjali Malti kif xieraq.
Ladarba d-dettalji tiegħek jiġu vverifikati bħala korretti, jinħoloq ċertifikat ta’ reġistrazzjoni.
Inti tirċievi ċ-ċertifikat bl-email jekk l-indirizz tiegħek ikun irreġistrat mad-Dipartiment tas-Sigurtà Soċjali għall-għanijiet ta’ Notifika. Inkella, jiġi stampat u mibgħut lilek.
Għal dawk iċ-ċittadini tal-UE li jinsistu li ma jixtiequx japplikaw għal Karta tal-Identità Maltija taħt l-Att dwar il-Moviment Liberu, huma ggwidati lejn l-applikazzjoni online għan-Numru tas-Sigurtà Soċjali.

Dokumentazzjoni meħtieġa

Iċ-Ċittadini Maltin kollha (ħlief dawk minuri) li għandhom in-numru tal-Karta tal-Identità Maltija tispiċċa bil-M, G, L jew H:
- Dawn jinħarġilhom awtomatikament in-Numru tas-Sigurtà Soċjali kif spjegat aktar ‘l fuq, għalhekk m’hemmx bżonn ta’ applikazzjoni jew tipprovdi xi dokumentazzjoni.

Iċ-Ċittadini Maltin kollha li huma minuri ta’ bejn ‘l erbatax (14) u sittax-il (16) sena u li għandhom Karta tal-Identità Maltija tispiċċa bil-L jew H).
- Dawk l-istudenti li għadhom ma temmux l-iskola obbligatorja (sal-Form 5) u għadhom ma għalqux sittax-il (16) sena u jixtiequ li jibdew jaħdmu, iridu jissottomettu applikazzjoni lid-Dipartiment tar-Relazzjonijiet Industrijali u tal-Impjieg (DIER). L-applikazzjoni trid tkun iffirmata mill-ġenitur/i jew kustodja/i legali tal-istudent u minn min ser ikun qed iħaddem. Hekk kif l-applikazzjoni tiġi approvata mid-DIER, is-Servizzi Nazzjonali ta’ Sapport għall-Iskola (NSSS) toħroġ ittra ta’ eżenzjoni mill-iskola li tintbagħat lill-ġenitur/i jew kustodja/i legali tal-istudent. Ikklikkja hawn biex tniżżel l-applikazzjoni għall-Eżenzjoni mill-Iskola u l-proċeduri relatati.
- Karta tal-Identità Maltija valida għall-identifikazzjoni.
- Ċertifikat tat-Tluq mill-Iskola u Profil jew nota ffirmata mill-Kap tal-Iskola fejn jikkonferma li l-istudent temm l-iskola obbligatorja.
- Eżenzjoni mill-Iskola mis-Servizzi Nazzjonali ta’ Sapport għall-Iskola (NSSS) jekk il-minuri għadu ma temmx l-aħħar sena obbligatorja u għadu/ għadha ma għalaqx/ għalqetx l-età ta’ sittax-il sena. Importanti li din l-ittra ta’ eżenzjoni tkun f’idejn l-applikant/a qabel j/tapplika għan-numru tas-Sigurtà Soċjali.
- Dawn il-minuri jridu jattendu f’xi ċentru ta’ Jobsplus biex jagħmlu talba għall-ħruġ tan-Numru tas-Sigurtà Soċjali.

Iċ-Ċittadini kollha tal-UE li m’humiex ċittadini maltin u li għandhom Karta tal-Identità Maltija valida u se jkunu qed jaħdmu f’Malta:
- Dawn iridu jattendu f’xi ċentru ta’ Jobsplus u juru Karta tal-Identità Maltija valida għall-identifikazzjoni.
- Kopja tal-kuntratt tax-xogħol iffirmat mill-prinċipal u li juri d-data ta’ meta se jibda jaħdem.

Iċ-Ċittadini kollha tal-UE kemm jekk Impjegati jew jaħdmu għal rashom u m’għandhomx Karta tal-Identità Maltija valida:
- Dawn iċ-ċittadini jridu japplikaw online billi jawtentikaw bil-kont tal-eIDAS biex jagħmlu talba għall-ħruġ tan-numru tas-Sigurtà Soċjali. Dawn il-persuni jinkludu membri ta’ Ekwipaġġ tal-Ajru, Baħrin, Mariner, Trasportaturi jew ċittadini f’Sitwazzjoni Transkonfinali tal-UE.
- Dokument uffiċċjali validu fejn juri ritratt riċenti tal-applikant/a, maħruġ mill-pajjiż ta’ oriġini, kif ukoll passport validu.
- Kopja tal-kuntratt tax-xogħol fejn juri li l-applikant/a se j/tkun qed tagħmel xogħol bħala impjegat/xogħol għal rasu/ha f’Malta.

Ċittadini minn Pajjiżi mhux tal-UE li se jaħdmu bħala Impjegati.
- Dawn iridu jattendu f’xi ċentru ta’ Jobsplus jekk għandhom Karta ta’ Identità Maltija valida għall-identifikazzjoni, kif ukoll jipprovdu Passport validu.
- Kopja tal-kuntratt tax-xogħol iffirmat mill-prinċipal fejn juri ukoll id-data meta se jibda xogħol jew li l-applikant se jwettaq attività għal rasu f’Malta.
- Kopja tal-Liċenzja tal-Impjieg fejn turi n-numru ta’ RefCom. Dan id-dokument huwa magħruf ukoll bħala ‘Work Permit’.

Ċittadini minn pajjiżi li mhumiex membri tal-UE, miżżewġin ma’ Maltin jew Ċittadini tal-UE (Impjegati jew jaħdmu għal rashom).
- Karta tal-Identità Maltija valida, kif ukoll Passport.
- Kopja tal-ittra mid-Dipartiment taċ-Ċittadinanza u Espatrijati, li turi prova li l-applikant jista’ jaħdem jew jgħix liberament f’Malta skont l-Att tal-Libertà tal-Moviment.
- Kopja tal-kuntratt tax-xogħol iffirmat mill-prinċipal fejn juri ukoll id-data meta se jibda xogħol jew li l-applikant se jwettaq attività għal rasu f’Malta.

Ċittadini minn Pajjiżi mhux tal-UE (li jaħdmu għal rashom).
- Karta tal-Identità Maltija valida u Passport validu.
- Kopja tal-Liċenzja tax-Xogħol.

Ċittadini minn Pajjiżi mhux tal-UE li għandhom permess biex jaħdmu f’Malta skont waħda mid-Direttivi tal-UE.
- Karta tal-Identità Maltija u Passport validu.
- Kopja tal-kuntratt tax-xogħol iffirmat mill-prinċipal fejn juri ukoll id-data meta se jibda xogħol.

Kopja tal-permess rilevanti għax-xogħol f’Malta taħt waħda mid-Direttivi tal-UE, li tkun viżibbli fuq id-dokument ta’ identifikazzjoni tal-applikant (jew iċ-ċertifikat ekwivalenti tiegħu) li jinħareġ mill-aġenzija tal-gvern Malti Identità.

Persuna li qed tfittex ażil u titlob biex taħdem f’Malta:
- Persuni li qed ifittxu ażil għandhom japplikaw għan-Numru tas-Sigurtà Soċjali billi jmorru f’ċentru ta’ Servizz.gov biex japplikawlhom f’isimhom skont l-eleġibilità.

Wara li tikseb in-Numru tal-Karta tal-Identità Maltija, l-individwi huma meħtieġa jaġġornaw immedjatament id-dettalji ta’ kuntatt tagħhom mad-Dipartiment tas-Sigurtà Soċjali. Dan jinkludi li jipprovdu indirizz elettroniku validu sabiex ikun possibbli li jintbagħat iċ-ċertifikat tan-Numru tas-Sigurtà Soċjali u korrispondenza oħra relatata mad-Dipartiment tas-Sigurtà Soċjali b’mod diġitali. Biex taċċessa s-servizz biex taġġorna d-Dettalji ta’ Kuntatt, trid tidħol fl-URL fil-browser tal-internet: contact-dss.gov.mt u tivverifika bl-awtentikazzjoni tal-e-ID jekk għandek Karta tal-Identità Maltija valida. Jekk m’għandekx Karta tal-Identità Maltija valida, allura jew trid tidħol fl-URL: contactdss.gov.mt u tagħżel ‘Dettalji ta’ Kuntatt’ mil-lista li tinżel biex titlob li taġġorna d-dettalji ta’ kuntatt tiegħek, jew inkella tista’ tmur personalment f’ċentru ta’ Servizz.gov biex jaġġornawlek id-dettalji ta’ kuntatt tiegħek f’ismek.