Numru tas-Sigurtà Soċjali

Ħarsa ġenerali

In-numru tas-sigurtà soċjali (qabel magħruf bħala numru N.I.) jirreġistra persuni taħt l-Att dwar is-Sigurtà Soċjali (Kap. 318.) u jintuża biex tħallas il-kontribuzzjonijiet tas-sigurtà soċjali. Il-ħaddiema jkollhom dawn il-kontribuzzjonijiet imnaqqsa mis-salarju tiegħha jekk int impjegat/a jew billi tagħmel pagamenti mal-Kummissarju tad-Dħul f’każ li int taħdem għal rasek. Dawn il-kontribuzzjonijiet tas-sigurtà soċjali jagħtuk dritt għall-benefiċċji tas-sigurtà soċjali provduti taħt l-Att dwar is-Sigurtà Soċjali (KAP. 318.), soġġett għall-kundizzjonijiet ta’ intitolament. Tista’ ssib aktar informazzjoni dwar il-kategoriji u l-ammont ta’ kontribuzzjonijiet tas-sigurtà soċjali li l-impjegati u dawk li jaħdmu għal rashom/għalihom infushom iridu jħallsu hawn.

Minn Ottubru 2016, persuni li għandhom il-Karta tal-Identità Maltija (M, L, G, H) ma jibqgħux jingħataw numru separat tas-sigurtà soċjali. Madankollu, impjegati u persuni li jaħdmu għal rashom li għandhom il-Karta ta’ Residenza Maltija li tispiċċa b’‘A’, jew dawk li m’għandhomx Karta ta’ Residenza permanenti Maltija, xorta jingħataw numru tas-sigurtà soċjali.

Minn Lulju 2025, proċess ġdid ma’ Jobsplus jawtomatizza t-talbiet għan-numru tas-sigurtà soċjali. Meta min iħaddem jirreġistra b’Engagement Form ma’ Jobsplus, id-dettalji tal-impjegat jintbagħtu lid-Dipartiment tas-Sigurtà Soċjali. Jekk ikun eliġibbli, l-impjegat jirċievi Numru tas-Sigurtà Soċjali u Ċertifikat ta’ Reġistrazzjoni bil-posta.

Jekk, matul dan il-proċess, l-impjegat ma jkollux Karta ta’ Residenza Maltija, is-sistema tibgħat awtomatikament email lill-applikant. Din l-email tistruzzjona lill-individwu biex jew jitlob Karta ta’ Residenza Maltija permezz ta’ Identità u sussegwentement jerġa’ lura għand Jobsplus biex jaġġorna d-dettalji tal-impjegat, jew inkella japplika direttament għal Numru tas-Sigurtà Soċjali permezz tal-applikazzjoni online jew billi jmur fiċ-ċentru ta’ Servizz.gov.

Mill-applikazzjoni online hija biss din il-lista ta’ ħaddiema li jaċċetta Impjegatur jitlob Numru tas-Sigurtà Soċjali f’isimhom:

Ekwipaċċ tal-Ajru: Persuna li taħdem bħala ekwipaċċ fuq ajruplan li l-bażi ewlenija tiegħu tinsab Malta u li hija suġġetta għal-leġiżlazzjoni Maltija skont ir-Regolament tal-UE 883/2004.
Baħri: Persuna li taħdem jew bħala impjegat jew bħala persuna taħdem għal rasha fuq vapur Malti u li hija suġġetta għal-leġiżlazzjoni Maltija skont ir-Regolament tal-UE 883/2004.
Trasportatur: Persuna li taħdem f’diversi Stati Membri tal-EU minħabba d-dmirijiet tat-trasport u li hija suġġetta għal-leġiżlazzjoni Maltija skont ir-Regolament tal-UE 883/2004.
Ċittadin Ħaddiem f’sitwazzjoni transkonfinali tal-EU: Persuna li taħdem f’sitwazzjoni kumplessa bejn Stati Membri tal-EU differenti u li hija suġġetta għal-leġiżlazzjoni Maltija skont ir-Regolament tal-UE 883/2004.
EUNA: Ċittadini tal-UE rreġistrati ma’ impjegatur Malti.

Nota: L-applikazzjoni għal numru ta’ reġistrazzjoni għal skopijiet ta’ sigurtà soċjali ma jfissirx neċessarjament li inti tkun irreġistrat awtomatikament. Il-pożizzjoni tal-assikurazzjoni tiegħek trid tiġi determinata mid-Dipartiment tas-Sigurtà Soċjali.

X’se tingħata

Persuni li huma fil-pussess ta’ Karta tal-Identità Maltija permanenti jiġu rreġistrati awtomatikament taħt l-Att tas-Sigurtà Soċjali (Kap. 318.) ladarba jilħqu l-età ta’ sittax-il (16) sena. Persuni li m’għandhomx Karta tal-Identità Maltija permanenti u li għandhom bejn sittax-il (16) sena u l-età tal-pensjoni jridu jirreġistraw għal numru ta’ reġistrazzjoni tas-sigurtà soċjali. Dan in-numru jinħareġ darba biss u jibqa’ validu tul il-ħajja tal-applikant.

Dawk il-persuni li għandhom Karta tal-Identità Maltija valida se jirċievu ċ-ċertifikat ta’ reġistrazzjoni tagħhom awtomatikament ftit jiem qabel ma jilħqu l-età ta’ sittax (16) -il sena.

Għal dawk li m’għandhomx Karta ta’ Residenza Maltija permanenti u għalhekk huma meħtieġa jużaw l-applikazzjoni online, iċ-ċertifikat ta’ reġistrazzjoni u n-numru tas-sigurtà soċjali jintbagħtu permezz tal-indirizz elettroniku pprovdut fl-applikazzjoni ladarba jiġu sodisfatti l-kriterji tal-assigurazzjoni. Din l-informazzjoni ma tiġix kondiviża ma’ partijiet terzi oħra ħlief jekk tkun koperta mil-leġiżlazzjoni jew minn ftehim ta’ qsim tad-data.

Applikazzjoni tieħu madwar ġimagħtejn (2) sabiex tiġi ppoċessata jekk id-dokumenti mehmuża jkunu kif rikjesti.

Għal aktar informazzjoni dwar l-obbligi tal-Kontribuzzjonijiet tas-Sigurtà Soċjali ikklikkja hawn.

Eliġibbiltà

Kriterji ta’ eliġibbiltà:

Inti eliġibbli għall-ħruġ awtomatiku ta’ Numru tas-Sigurtà Soċjali (SSN) jekk:

Qiegħed tiġi ingaġġat għal xogħol, u l-impjegatur tiegħek irid jissottometti Engagement Form online mill-portall online tal-Impjegatur tal-Jobsplus. L-impjegatur irid jiżgura li għandu id-dokumenti kollha meħtieġa f’idejh.
M’għandekx diġà Numru tas-Sigurtà Soċjali Malti.
Għandek mill-inqas erbatax-il (14) il sena. Jekk għadek fl-età obbligatorja tal-iskola, il-ġenitur jew il-kustodju legali tiegħek irid l-ewwel japplika għall-permess permezz tas-Servizzi Nazzjonali ta’ Appoġġ għall-Iskejjel. Ladarba din tiġi approvata, l-applikazzjoni tintbagħat lid-Dipartiment tar-Relazzjonijiet Industrijali u tal-Impjiegi (DIER) għall-kunsens tagħhom. DIER jibgħat email lill-impjegatur u lill-ġenitur jew kustodju legali bl-ittra ta’ approvazzjoni jew rifjut. F’każ ta’ approvazzjoni, l-impjegatur irid jidħol fis-sit ta’ Jobsplus billi jawtentika biex jissottometti l-Jobsplus Engagement Form online.
Id-dettalji personali tiegħek, bħall-isem sħiħ, data tat-twelid, u n-nazzjonalità huma rreġistrati b’mod korrett mal-Aġenzija Identità.
Jekk l-impjieg tiegħek ma’ Jobsplus jinkludi numru validu ta’ Karta tal-Identità Maltija, trid tipprovdi indirizz ta’ email validu. Jekk ma tipprovdix numru validu ta’ Karta tal-Identità Maltija, trid tipprovdi kemm indirizz ta’ email kif ukoll numru validu ta’ passaport. Dan jiżgura li tista’ tiġi kkuntattjat u gwidat dwar kif tikseb il-Karta tal-Identità Maltija. Ladarba l-Karta tal-Identità Maltija tiġi maħruġa u tkun eliġibbli għand l-Aġenzija Jobsplus, it-talba tiġi sottomessa mill-ġdid u jinħareġ in-Numru tas-Sigurtà Soċjali Malti kif xieraq.
Ladarba d-dettalji tiegħek jiġu vverifikati bħala korretti, jinħoloq ċertifikat ta’ reġistrazzjoni. Jekk qed tapplika online, inti tirċievi ċ-ċertifikat bl-email jekk l-indirizz tiegħek ikun irreġistrat mad-Dipartiment tas-Sigurtà Soċjali għall-għanijiet ta’ Notifika. Inkella, jiġi stampat u mibgħut lilek bil-posta.
Għalkemm il-barranin kollha li jaħdmu f’Malta huma avżati japplikaw għal Karta ta’ Residenza Maltija, iċ-ċittadini tal-UE li ma jixtiqux japplikaw għal Karta ta’ Residenza Maltija minħabba l-Att dwar il-Libertà tal-Moviment, huma avżati japplikaw għan-Numru tas-Sigurtà Soċjali permezz tal-applikazzjoni online.

Dokumentazzjoni meħtieġa

Iċ-Ċittadini kollha tal-UE kemm impjegati jew jaħdmu għal rashom u li m’għandhom Karta tal-Identità Maltija valida:
- Kopja tal-kuntratt tax-xogħol iffirmat mill-impjegatur u li juri d-data ta’ meta se jibda jaħdem u xogħol li se jkun qed jaħdem.

Ċittadini minn Pajjiżi mhux tal-UE li se jaħdmu bħala Impjegati.
- Kopja tal-kuntratt tax-xogħol iffirmat mill-prinċipal fejn juri ukoll id-data meta se jibda xogħol jew li l-applikant se jwettaq attività għal rasu f’Malta.
- Kopja tal-Liċenzja tal-Impjieg fejn turi n-numru ta’ RefCom. Dan id-dokument huwa magħruf ukoll bħala ‘Work Permit’.
Ċittadini minn pajjiżi li mhumiex membri tal-UE, miżżewġin ma’ Maltin jew Ċittadini tal-UE (Impjegati jew jaħdmu għal rashom).
- Kopja tal-ittra mid-Dipartiment taċ-Ċittadinanza u Espatrijati, li turi prova li l-applikant jista’ jaħdem jew jgħix liberament f’Malta skont l-Att tal-Libertà tal-Moviment.
- Kopja tal-kuntratt tax-xogħol iffirmat mill-prinċipal fejn juri ukoll id-data meta se jibda xogħol jew li l-applikant se jwettaq attività għal rasu f’Malta.
Ċittadini minn Pajjiżi mhux tal-UE (li jaħdmu għal rashom).
- Kopja tal-Liċenzja tax-Xogħol.
Ċittadini minn Pajjiżi mhux tal-UE li għandhom permess biex jaħdmu f’Malta skont waħda mid-Direttivi tal-UE.
- Kopja tal-kuntratt tax-xogħol iffirmat mill-impjegatur fejn juri ukoll id-data meta se jibda xogħol.
- Kopja tal-permess rilevanti għax-xogħol f’Malta taħt waħda mid-Direttivi tal-UE, li tkun viżibbli fuq id-dokument ta’ identifikazzjoni tal-applikant (jew iċ-ċertifikat ekwivalenti tiegħu) li jinħareġ mill-aġenzija tal-gvern Malti Identità.
Persuna li qed tfittex ażil u titlob biex taħdem f’Malta:
- Persuni li qed ifittxu ażil għandhom japplikaw għan-Numru tas-Sigurtà Soċjali billi jmorru f’ċentru ta’ Servizz.gov biex japplikawlhom f’isimhom skont l-eleġibilità.

Ladarba tikseb in-numru tal-Karta tal-Identità/Residenza Maltija, l-individwi huma meħtieġa jaġġornaw immedjatament id-dettalji ta’ kuntatt li jinsabu fid-Dipartiment tas-Sigurtà Soċjali. Dan jinkludi li tipprovdi indirizz elettroniku validu sabiex ikun possibbli li tiġi mibgħuta b’mod diġitali ċ-ċertifikat tan-Numru tas-Sigurtà Soċjali u korrispondenza oħra relatata mad-Dipartiment tas-Sigurtà Soċjali. Biex taċċessa s-servizz biex taġġorna d-Dettalji ta’ Kuntatt, trid tidħol fl-URL fil-browser tal-web: contact-dss.gov.mt u jekk għandek Karta tal-Identità/Residenza Maltija valida, awtentika bil-e-ID tiegħek. Jekk m’għandekx Karta tal-Identità/Residenza Maltija valida, jew tmur fl-URL fil-browser tal-web: contactdss.gov.mt u mill-lista li tinżel tagħżel ‘Dettalji ta’ Kuntatt’ biex taġġorna d-dettalji ta’ kuntatt tiegħek jew inkella tista’ tmur personalment f’xi ċentru ta’ Servizz.gov biex jaġġornawlek id-dettalji ta’ kuntatt tiegħek f’ismek.

Jekk m’għandekx Karta tal-Identità/Residenza Maltija valida, ikun meħtieġ kemm indirizz ta’ email kif ukoll numru tal-passaport. Dan jiżgura li nistgħu nikkuntattjawk u ngħinuk kif tikseb il-Karta ta’ Residenza Maltija. Ladarba tinħareġ il-Karta ta’ Residenza Maltija u tintbagħat lil Jobsplus, it-talba tiġi sottomessa mill-ġdid u n-numru tas-Sigurtà Soċjali jiġi ġġenerat kif suppost.

Għalhekk huwa importanti ħafna li ladarba tkun fil-pussess tan-numru tal-Karta tal-Identità Maltija tiegħek, għandek tipproċedi biex tissottometti dan in-numru lil Jobsplus sabiex tkompli bl-applikazzjoni tiegħek għar-Reġistrazzjoni tas-Sigurtà Soċjali Maltija, kif indikat hawn taħt.

Biex tinforma lil Jobsplus bin-numru l-ġdid tal-Karta tal-Identità Maltija tiegħek, jekk jogħġbok ibgħat email lil Jobsplus Social Security Registrations fuq: hriu.jobsplus@gov.mt, u nkludi n-numru tal-passaport tiegħek, in-numru tal-Karta tal-Identità Maltija tiegħek u kwalunkwe referenza oħra użata minn Jobsplus.