Minn Ottubru 2016, in-numru tas-sigurtà soċjali tneħħa għal dawk li għandhom Karta tal-Identità permanenti Maltija li għandha l-ittri M, L, G, jew H. Issa jintuża biss għal individwi li m’għandhomx Karta tal-Identità permanenti Maltija.

X’hemm ġdid?

Minn Lulju 2025, ladarba l-Formola ta’ Impjieg ta’ persuna tiġi rreġistrata ma’ Jobsplus, id-dettalji tagħha jintbagħtu awtomatikament lid-Dipartiment tas-Sigurtà Soċjali. Jekk tkun eliġibbli, jinħareġ in-numru tas-sigurtà soċjali f’ħin reali.

Persuna li mhux  ta’ Nazzjonalità Maltija li tibda taħdem f’Malta u li m’għandiex Karta tal-Identità permanenti Maltija issa tista’ tingħata n-numru tas-sigurtà soċjali awtomatikament (SSN). Ladarba l-Formola ta’ Impjieg tiġi rreġistrata ma’ Jobsplus, id-dettalji jintbagħtu lid-Dipartiment tas-Sigurtà Soċjali. Jekk l-informazzjoni personali, inkluż l-isem, l-indirizz u d-data tat-twelid, taqbel mar-rekords uffiċjali tal-Aġenzija tal-Gvern Maltija Identità, l-SSN jinħareġ awtomatikament mingħajr il-bżonn ta’ applikazzjoni separata.

Kif tivverifika l-eliġibilità

Inti eliġibbli għal SSN awtomatiku jekk:

• Qiegħed tibda impjieg permezz ta’ Jobsplus.
• M’għandekx diġà numru tas-sigurtà soċjali.
• Id-dettalji personali tiegħek (isem, data tat-twelid, nazzjonalità) huma rreġistrati b’mod korrett ma’ Identità.
• Jekk l-impjieg tiegħek ma’ Jobsplus jinkludi numru validu ta’ Karta tal-Identità Maltija, m’hemmx bżonn ta’ indirizz ta’ email.
• Jekk ma jkunx ipprovdut numru validu ta’ Karta tal-Identità, ikun hemm bżonn kemm indirizz ta’ email kif ukoll in-numru tal-passaport. Dan jiżgura li tkun tista’ tiġi kkuntattjat u gwidat dwar kif tikseb il-Karta tal-Identità Maltija. Ladarba l-Karta tal-Identità tinħareġ u tintbagħat lil Jobsplus, it-talba terġa’ tiġi sottomessa u jinħareġ l-SSN kif suppost.

X’jiġri wara?

• Ladarba d-dettalji tiegħek jiġu verifikati, jinħoloq ċertifikat ta’ reġistrazzjoni.
• Inti tirċievi ċ-ċertifikat bl-email jekk l-indirizz tiegħek ikun irreġistrat mad-Dipartiment tas-Sigurtà Soċjali għall-notifiki. Inkella, jiġi stampat u mibgħut lilek fl-indirizz postali pprovdut matul il-proċess.

Għal ċittadini tal-UE li jagħżlu li ma japplikawx għal Karta tal-Identità Maltija, jiġu referuti għall-applikazzjoni online tal-SSN.