Għotja għal Carer

Ħarsa ġenerali

L-Għotja għal Carer ġiet introdotta mill-1 ta’ Jannar 2021, skont il-miżuri tal-baġit. Din tingħata lil dak il-ġenitur li mhuwiex f’impjieg, sabiex ikun jista’ jieħu ħsieb wild jew ulied b’diżabilità fl-età ta’ aktar minn sittax-il (16) sena u li j/tkun j/tirċievi jew jirċievu l-Assistenza Miżjuda għal Diżabilità Severa. Il-Baġit tal-2025 introduċa bidliet f’din l-Għotja, biex jilqa’ lill-ġenituri li mhumiex f’impjieg sabiex jieħdu ħsieb tifel/tifla jew tfal b’diżabilità severa taħt is-sittax (16) sena u li jirċievu l-Allowance tat-Tfal b’Diżabilità.

X’se tingħata

Mis-sena 2025, l-Għotja għal Carer se tiżdied għal ħamest elef u mija u disgħin ewro (€5,190) fis-sena. Dan il-pagament jinqasam f’erba’ pagamenti bir-rata ta’ elf u mitejn u seba’ u disgħin ewro u ħamsin ċenteżmu (€1,297.50) kull tliet (3) xhur.  L-Għotja għal Carer titħallas lill-ġenitur li ma jkunx qiegħed jipparteċipa fid-dinja tax-xogħol minħabba li jkun qiegħed jieħu ħsieb lill-wild jew ulied b’diżabilità u li jkun jew ikunu qed jirċievu l-Assistenza Miżjuda għal Diżabilità Severa jew Allowance tat-Tfal b’Diżabilità. li kisbu perċentwal ta’ 75% jew aktar, wara li ġew eżaminati mill-Bord Interprofessjonali permezz tal-qafas tal-ICF (tfal u żgħażagħ).

Ikklikkja hawn għal Skeda ta’ dati ta’ ħlas.

Eliġibbiltà

• Il-ġenitur ma jridx ikun f’impjieg u jkun igħix fl-istess dar mal-wild jew ulied b’diżabiltà ta’ aktar minn sittax-il (16) sena u li jkun j/tirċievi jew jirċievu l-Assistenza Miżjuda għal Diżabilità Severa,
  jew
  Il-ġenitur ma jridx ikun f’impjieg u jkun igħix fl-istess dar mal-wild jew ulied b’diżabiltà li għandhom inqas minn sittax-il (16) sena u li għalihom jkun qed jirċievu  l-Allowance tat-Tfal B’Diżabilità u li kisbu perċentwal ta’ 75% jew aktar wara li ġew eżaminati mill-Bord InterProfessjonli permezz tal-qafas tal-ICF (tfal u żgħażagħ).
• Meta l-ġenitur eliġibbli j/tasal għall-età pensjonabbli, il-ġenitur intitulat/a jibqa’ jirċievi l-Għotja tal-Carer, sakemm il-wild/ulied ikunu għadhom jgħixu magħhom, anke f’każijiet fejn il-ġenitur ikun mgħoti pensjoni tal-irtirar.
• Il-ġenitur ma jistax i/tkun qed tirċievi l-Allowance miżjuda tal-Carers, Allowance għal Carer jew Assistenza Miżjuda għal Assistenza ta’ Diżabilità.
• Jekk il-ġenitur li jkun jissodisfa l-kriterji ġa msemmija u jkun jirċievi Assistenza Miżjuda għal Diżabilità Severa f’ismu ma jkunx eliġibbli għal din l-Għotja.
• Jekk il-ġenitur li jkun jissodisfa l-kriterji ġa msemmija u jkun pazjent ta’ Allowance Miżjuda għal Carers jew Allowance għal Carers ma jkunx eliġibbli għal din l-Għotja.
• F’każ li l-wild jew ulied li jkun jirċievi Assistenza Miżjuda għal Diżabilità Severa u qarib ikun qiegħed jirċievi Allowance Miżjuda għal Carers jew Allowance għal Carers għaliex ikun qed jieħu ħsieb lil wild, il-ġenitur ma jkunx eliġibbli għall-Għotja għal Carer.

Dokumentazzjoni meħtieġa

• M’hemmx bżonn ta’ dokumentazzjoni.

Kif tapplika

Il-proċess għall-ħlas tal-Għotja għal Carer jinbeda awtomatikament mid-Dipartiment tas-Sigurtà Soċjali f’każijiet fejn ikun hemm ġenitur li ma jkunx f’impjieg u jgħix fl-istess dar mal-wild jew l-ulied b’diżabilitàta’ il-fuq minn sittax-il (16) sena u j/tirċievi jew jirċievu Għajnuna Miżjuda għal Diżabilità Severa.

Ġenituri qiegħda u li għandhom tfal taħt is-sittax (16) sena li diġà qed jirċievu l-Allowance għat-Tfal b’Diżabilità u li ma ġewx eżaminati mill-Bord Interprofessjonali, jeħtieġ li jżuru lit-Tabib / Speċjalista Kuranti / Pedjatra tagħhom biex jissottomettu applikazzjoni ġdida għall-Allowance għat-Tfal b’Diżabilità f’isem it-tifel/tifla/tfal sabiex dawn jiġu eżaminati mill-Bord Interprofessjonali. Jekk ir-riżultat mill-ICF (Tfal u Żgħażagħ) jirriżulta f’75% jew aktar, l-Għotja tal-Carer tiġi attivata awtomatikament mid-Dipartiment lil ġenitur. Ikklikkja hawn biex taqra aktar.