Assistenza Sussidjarja għal Diżimpjieg

Ħarsa ġenerali

L-Assistenza Sussidjarja għal Diżimpjieg tista’ tingħata lil:

• Persuna li għandha Status ta’ Protezzjoni Sussidjarja,
• Persuna li mhix f’impjieg u li tissodisfa it-test tal-mezzi skont l-Att dwar is-Sigurtà Soċjali (Kap. 318.),
• Persuna waħeda jew Persuna Responsabbli tal-Familja li għandha aktar membri tal-familja jgħixu magħha.

X’se tingħata

Il-benefiċċjarji tal-Assistenza Sussidjarja għal Diżimpjieg jitħallsu biss il-benefiċċju bażiku u dan isir darba fil-ġimgħa. 

Jekk il-persuna responsabbli tal-familja tkun qiegħeda tgħix waħeda, tkun tista’ tirċievi l-Assistenza Sussidjarja għal Diżimpjieg f’isimha. Mill-banda l-oħra, jekk il-familja tkun iffurmata minn membri oħra, il-persuna responsabbli tal-familja tirċievi l-Assistenza Sussidjarji għal Diżimpjieg f’isimha u f’isem il-membri l-oħra li jiffurmaw parti mill-familja li tgħix fid-dar.

L-Assistenza Sussidjarja għal Diżimpjieg tista’ tiżdied bir-rata applikabbli addizzjonali meta jiżdiedu membri fil-familja. Minn naħa l-oħra, jekk xi membru tal-familja ma jibqax jgħix fl-istess dar residenzjali r-rata tal-benefiċċju tonqos. 

Kwalunkwe bidla fiċ-ċirkostanza, bħal bidla fl-indirizz, bidla fin-numru ta’ kuntatt, tfal addizzjonali, bidliet fil-kompożizzjoni tad-dar, mewt, proċeduri tal-qorti, safar jew tluq minn Malta għal kwalunkwe raġuni u għal kwalunkwe tul ta’ żmien, għandha tiġi rrappurtata immedjatament lid-Dipartiment tas-Sigurtà Soċjali.

Ikklikkja hawn għal Skeda tar-Rati tal-Benefiċċji.

Eliġibbiltà

• L-applikant/a huwa / hija l-Persuna responsabbli tal-Familja.
• L-applikant/a mhux impjegat/a.
• L-applikant/a i/trid i/tkun fil-pussess ta’ Ċertifikat ta’ Protezzjoni Sussidjarja validu.
• L-applikant/a i/trid ikollu/ha Karta tal-Identità Maltija valida.
• L-applikant/a i/trid j/tiddikjara kull Kapital u/jew dħul li ġej minn Malta u/jew Barra minn Malta.
• L-applikant/a għandu/ha j/tissodisfa t-Test tal-Mezzi Kapitali. Ir-riżorsi kapitali m’għandhomx jaqbżu sitta u għoxrin elf ewro (€26,000) f’każ ta’ koppja, u sittax il-elf ewro (€16,000) f’każ ta’ persuna waħeda.
• Kull dħul li ġej minn Kirjiet, Interessi Bankarji minn Kapital, Stokks u Ishma, Manteniment u kwalunkwe dħul ieħor derivat, m’għandux jeċċedi r-rata massima ta’ Assistenza Sussidjarja għal Diżimpjieg skont il-familja. 

Benefiċjarju għandu jmur personalment f’ċentru ta’ Servizz.gov kull meta jiġi nnotifikat biex jippreżenta Ċertifikat tal-Verifika tal-Ħajja maħruġ mid-Direttorat għall-Għajnuna Finanzjarja.

Dokumentazzjoni meħtieġa

• Karta ta’ Residenza valida ta’ kull membru li jgħixu fl-istess dar.
• Ċertifikat validu ta’ Protezzjoni Sussidjarja maħruġ mill-Aġenzija tan-Nazzjonijiet Uniti għar-Refuġjati (UNHCR) f’Malta ta’ kull membru li jgħixu fl-istess dar.
• L-aħħar Kont tal-Ilma u d-Dawl ta’ fejn j/tirrisjedi l-applikant/a.
• Rendikonti riċenti tal-Bank tal-kontijiet bankarji lokali u barranin.
• Dokumenti relattati tal-valur ta’ kwalunkwe Ħażniet / Ishma / Bonds u d-dħul derivat minnhom.
• Valur tas-suq ta’ kull proprjetà vakanti f’Malta u / jew barra (li mhix Dar ta’ Residenza u / jew Residenza tas-Sajf).
• Kopja tal-kuntratt tal-kera tal-Awtorità tad-Djar jekk id-dar tar-residenza fejn joqgħod l-applikant tkun mikrija.
• Kopja tal-kuntratt tal-kera jekk il-kera tkun ġejja minn proprjetajiet oħra.
• Rendikont / dokumenti li juru dħul minn kwalunkwe pensjoni ta’ barra.
• Dokumenti ta’ Separazzjoni / Divorzju jekk ikun il-każ.

Kif tapplika

Imla u ssottometti l-applikazzjoni online.