Assistenza għal Persuna b’Vista Batuta (DSS)

Assistenza għall-Persuna b'Vista Batuta tingħata lil persuna li jkollha erbatax-il (14) sena jew aktar, u li hija kompletament jew parzjalment nieqsa mid-dawl.

Assistenza għall-Persuna b'Vista Batuta titħallas kull erba’ (4) ġimgħat bil-quddiem.

Ikklikkja hawn għal Skeda tar-Rati tal-Benefiċċji.

Imla u ssottometti r-Rapport Mediku online.

Huma eliġibbli biss it-Tobba Mediċi biex japplikaw għal din l-assistenza f’isem l-applikant.

Kriterji ta’ eliġibbiltà ġenerali:

• L-applikant jrid ikollu erbatax-il (14) sena  jew aktar.

• Il-persuna trid tkun tbati mid-diżabilità qabel ma laħqet l-età ta’ sittin (60) sena.

• Applikazzjoni għall-Assistenza għal Persuna b’Vista Batuta mhux soġġetta għal Test tal-Mezzi Kapitali. Għalhekk applikant jista’ jkun qed iwettaq xogħol bi qligħ.  Minn Jannar 2022, l-applikant lanqas ma jsirlu test tal-mezzi tad-dħul fil-ġimgħa. Għalhekk, kemm il-Mezzi Kapitali, kif ukoll il-Mezzi tad-Dħul fil-Ġimgħa mhux se jiġu kkunsidrati.

• Persuna li tkun diġà qed tirċievi il-ħlas għall-Assistenza għall-Persuna b'Vista Batuta li tagħlaq sittin (60) sena, jkollha ir-rata tagħha miżjuda għall-ekwivalenti tar-rata tal-Pensjoni tal-Età.

• Id-dispożizzjonijiet tal-Artikolu 90 tal-Att dwar is-Sigurtà Soċjali (Kap. 318.) japplikaw "Drittijiet Duplikati", fejn benefiċjarju ma jistax jirċievi żewġ pensjonijiet; benefiċċji; assistenza jew allowance fl-istess ħin, iżda l-aħjar rata ta’ pensjoni; benefiċċju; assistenza jew Allowance.

• Il-bord Inter-Professjonali jiddeċiedi jekk il-każ in kwistjoni jaqax fil-parametri mediċi għal ħlas ta’ din l-assistenza.

• Applikant li kien eliġibbli għal Allowance għat-Tfal b'Diżabilità qabel l-età ta’ erbatax-il (14) sena, xorta jista’ jiġi eżaminat minn mill-bord Inter-Professjonali.