Ħatra ta’ Amministratur għall-Pensjonijiet u Benefiċċji (DSS)

Il-ħatra ta’ amministratur mad-Dipartiment tas-Sigurtà Soċjali tippermetti li individwu fdat jaġixxi f’isem persuna b’diżabilità mentali jew diżabilità oħra jew persuna taħt it-tmintax (18) sena li teħtieġ rappreżentanza attiva. Dan il-proċess jinvolvi kunsiderazzjonijiet legali u jeħtieġ konformità mar-regolamenti f’Malta.

Barra minn hekk, jekk rappreżentant li jkollu Prokura Ġenerali, Ordni ta’ Kustodja, jew Amministratur maħtur mill-Qorti ma jkunx irreġistrat fis-Sistema tal-Benefiċċji tas-Sigurtà Soċjali (SABS) tad-dipartiment u għandu l-ħsieb li jaġixxi f’isem individwu ieħor billi jissottometti applikazzjonijiet jew talbiet (esklużi dawk ta’ informazzjoni ġenerali), iridu jippreżentaw kopja ċċertifikata tal-Prokura Ġenerali, jew Ordni ta’ Kustodja, jew Ittra ta’ Amministrazzjoni (Ordni tal-Qorti) biex jiġu rreġistrati bħala Amministratur mad-Dipartiment tas-Sigurtà Soċjali.

Persuna taġixxi f’isem persuna benefiċjarja tas-Sigurtà Soċjali li teħtieġ rappreżentanza attiva.

L-obbligi ta’ din l-amministrazzjoni jinkludu:

1. Jifhem il-ħtiġijiet u l-preferenzi speċifiċi tal-persuna.

2. Jaġixxi fl-aħjar interess tal-persuna b'diżabilità jew tal-minuri.

3. Jieħu deċiżjonijiet li jallinjaw mal-benessri u l-aħjar interessi tal-persuna.

4. Jevita restrizzjonijiet bla bżonn u jippromwovi l-parteċipazzjoni tagħhom f'deċiżjonijiet li jaffettwaw ħajjithom.

5. Jiżgura li d-drittijiet u l-libertajiet tal-persuna jkunu rispettati.

6. Iżomm it-trasparenza u r-responsabbiltà f’kull deċiżjonijiet u azzjonijiet meħuda f'isem il-persuna.

7. Jinforma lid-Dipartiment tas-Sigurtà Soċjali b’kull bidla fiċ-ċirkustanza tal-Pensjonant/Benefiċjarju skont l-Artikolu 117 (1) tal-Att dwar is-Sigurtà Soċjali tal-1987.

8. L-għoti ta’ informazzjoni falza tiġi penalizzata kif stipulat fil-Kodiċi Kriminali (Kap. 9.).

Nota Importanti: L-Amministratur irid jippreżenta Karta tal-Identità Maltija valida meta jżur personali meta jattendi xi ċentru ta’ servizz.gov, anke jekk diġà rreġistrat mad-Dipartiment tas-Sigurtà Soċjali. Jekk il-persuna qed tapplika għall-ewwel darba bħala Amminstratur, iridu jiġu ppreżentati l-Karta tal-Identità kemm tal-Amministratur u tal-benefiċjarju.

Imla u ssottometti l-applikazzjoni online.

Individwu ta’ età legali jista’ japplika biex jinħatar bħala amministratur sabiex jaġixxi f’isem benefiċjarju tas-sigurtà soċjali b’diżabilitajiet mentali jew b’diżabilitajiet oħrajn, jew persuna taħt it-tmintax (18) sena. L-amministratur jamministra l-affarijiet u l-interessi tal-benefiċjarju, u jiżgura li l-bżonnijiet u d-drittijiet tagħhom ikunu protetti.

Wieħed jista’ japplika wkoll biex isir amministratur mad-Dipartiment tas-Sigurtà Soċjali, billi jipprovdi Dikjarazzjoni għall-Ħatra ta’ Amministratur, jew kopja vera ċċertifikata tal-Prokura Ġenerali, jew Ordni ta’ Kustodja, jew Ittra ta’ Amministrazzjoni (Ordni tal-Qorti).

Id-Dikjarazzjoni trid tkun awtentikata minn rakkomandant bħal Saċerdot, Tabib Mediku jew Speċjalista, Gradwat tal-Università, Membru Parlamentari, Maniġer ta’ bank, Uffiċċjal Pubbliku li ma jkunx ta’ grad anqas minn Prinċipal jew Pulizija li ma jkunx anqas minn grad ta’ Spettur. Ir-rakkomandant irid ikun ta’ nazzjonalità Maltija u jkun ilu jaf lil pensjonant / benefiċjarju u l-persuna li qed tagħmel it-talba għall-Amministratur, għal sentejn (2) jew aktar.

Jekk l-applikazzjoni hija għal Pensjoni ta’ Diżabilità, is-sezzjoni tax-xhud trid tkun mimlija minn Tabib Mediku jew Speċjalista.

Waqt il-verifikazzjoni, id-dettalji tar-rappreżentant/a jiġu rrekordjati fuq is-Sistema tal-Benefiċċji tas-Sigurtà Soċjali bħala amministratur għall-individwu.

Dokumentazzjoni Meħtieġa

Dokumentazzjoni Ġenerali:

• Dikjarazzjoni għall-Ħatra ta' Amministratur. Id-Dikjarazzjoni trid tkun awtentikata minn rakkomandant bħal Saċerdot, Tabib Mediku jew Speċjalista, Gradwat tal-Università, Membru Parlamentari, Maniġer ta’ Bank, Uffiċjal Pubbliku mhux taħt il-grad ta’ Prinċipal jew Uffiċjal tal-Pulizija mhux taħt il-grad ta’ Spettur. Jekk din l-applikazzjoni hija għal Pensjoni tad-Diżabilità, it-taqsima tax-xhud trid timtela minn Tabib Mediku jew Speċjalista; jew 

• Kopja ċċertifikata tal-Prokura Ġenerali; jew

• Ordni ta' Kustodja; jew

• Ittra ta' Amministrazzjoni (Ordni tal-Qorti).