Pensjoni tal-Irtirar

Ħarsa ġenerali

Il-Pensjoni Kontributorja tal-Irtirar hija benefiċċju fit-tul tas-Sigurtà Soċjali li tingħata lil individwi li jkunu laħqu l-età statutorja tal-pensjoni u jissodisfaw il-kundizzjonijiet meħtieġa tal-kontribuzzjonijiet tas-Sigurtà Soċjali. Din tipprovdi sors affidabbli ta’ dħul matul il-perjodu tal-irtirar, li jirrifletti kemm ix-xogħol tal-individwu, kif ukoll ir-rekord tal-kontribuzzjonijiet tiegħu.

Għal informazzjoni dwar sitwazzjonijiet transkonfinali ikklikkja hawn.

X’ser jingħata

Il-Pensjoni Kontributorja tal-Irtirar titħallas kull erba’ (4) ġimgħat bil-quddiem.

Hemm tliet (3) kategoriji ta’ pensjonijiet distinti li persuna tista’ tirċievi, li kull waħda minnhom tindirizza l-istorja differenti ta’ kontribuzzjonijiet u ċirkostanzi fl-impjieg:                           

• Pensjoni taż-Żewġ Terzi (TTP) – Pensjoni relatata mad-dħul li tiġi kkalkolata skont il-medja tal-kontribuzzjonijiet tas-Sigurtà Soċjali tal-individwu. Din tirrifletti d-dħul assigurat tal-ħaddiem matul il-perjodu ta’ valutazzjoni rilevanti.
• Pensjoni tal-Irtirar – Rata Fissa (RP) – li hija bbażata fuq rati fissi u li titħallas lir-rikorrenti li jirċievu l-Pensjoni tas-Servizz.
• Pensjoni Minima Nazzjonali (NMP) – li titħallas lil dawk il-persuni li jħallsu rata baxxa ta’ kontribuzzjonijiet tas-Sigurtà Soċjali.

Ikklikkja hawn għal Skeda tar-Rati tal-Benefiċċji.

Eliġibbiltà

L-età tal-pensjoni tiddependi mis-sena tat-twelid tal-persuna u jekk kienet impjegata jew taħdem għaliha nnifisha:

• 62 sena jekk twieldet bejn l-1952 u l-1955.
• 63 sena jekk twieldet bejn l-1956 u l-1958.
• 64 sena twieldet bejn l-1959 u l-1961.
• 65 sena jekk twieldet minn 1962 ‘l quddiem.

 Irtirar Bikri fl‑età ta’ 61 Sena

Persuna tista’ tagħżel li tirtira qabel l-età statutorja tal-pensjoni, iżda ma tistax tibda tirċievi l-pensjoni tal-irtirar qabel ma tagħlaq 61 sena, bil-kundizzjoni li ma tkunx u ma tkomplix tkun impjegata f’xogħol bi qligħ, waqt li tissodisfa n-numru meħtieġ ta’ kontribuzzjonijiet: 

• Twelid bejn 1952–1961: 35 sena (1820 kontribuzzjoni).
• Twelid bejn 1962–1968: 40 sena (2080 kontribuzzjoni).
• Twelid bejn 1969–1975: 41 sena (2132 kontribuzzjoni; fejn 35 minnhom iridu jkunu mħallsa).
• Twelid minn 1976 ‘il quddiem: 42 sena (2184 kontribuzzjoni; fejn 35 minnhom iridu jkunu mħallsa). 

Inċentivi għal minn jittardja l-Pensjoni – Ħidma lil hinn mill‑Età tal‑Pensjoni

Għal inċentivi oħra għal persuni li jibqgħu jaħdmu lil hinn mill‑età tal‑pensjoni tagħhom, ikklikkja hawn.

Miżuri miżjuda dwar l‑Eliġibbiltà għall‑Pensjoni

Il-minimu ta’ 10 snin kontribuzzjonijiet tas-Sigurtà Soċjali issa se jkun qed japplika għall-pensjonanti kollha, irrispettivament minn jekk humiex imwielda qabel jew wara l‑1962. Kontribuzzjonijiet imħallsa qabel ma jintlaħaq l-età minima tax-xogħol (iġifieri dawk taħt il‑18 jew 19-il sena), inkluż dawk taħt il‑miżura ta’ 520 kontribuzzjonijiet, jiġu kkunsidrati għall‑pensjonanti kollha.

Dokumentazzjoni meħtieġa

• FS3 għas-sena ta’ qabel tiġi sottomessa l-applikazzjoni tal-irtirar, f’każ jekk tkun impjegat/a.
• Rendikont tad-Dħul u l-Ħruġ li jrid ikun datat u ffirmat minn Accountant, flimkien mal-Irċevuti tal-Kontribuzzjonijiet tas-sigurtà soċjali tas-sena qabel l-irtirar, f’każ jekk tkun taħdem għal rasek.
• Jekk int Direttur jew għandek il-maġġoranza jew l-akbar numru ta’ ishma fil-kumpanija jew int relatat mal-familja ta’ Diretturi u/jew Shareholders oħra fil-kumpanija, trid tehmeż Memorandum tal-Assoċjazzjoni bid-dettalji, li tapplika biss jekk l-applikant/a twieled/twieldet qabel 1962.
• Dokument maħruġ minn Jobsplus bħala prova fejn juri terminazzjoni ta’ kull impjieg jekk l-applikanti jagħżlu li jirtiraw kmieni.
• Jekk tirċievi pensjoni oħra, inkluża xi pensjoni minn barra, trid tiġi pprovduta kopja tad-dokument uffiċċjali fejn juri d-dħul oriġinali.
• Document maħruġ mill-Malta Enterprise għas-snin fejn l-applikant/a kien/et j/tirċievi Suppliment tal-Paga tal-COVID.
• Applikanti li jagħżlu li jirtiraw kmieni, iġifieri ta’ l-età bejn il-wieħed u sittin (61) sena u erbgħa u sittin sena, iridu jaraw li l-impjiegi kollha tagħhom mal-Jobsplus huma tterminati.
• Dikjarazzjoni tal-Bank li tindika d-detentur tal-kont, fejn juri li l-kont irid ikun f’isem il-benefiċjarju biss. Id-dettalji tal-Bank jistgħu ukoll jiġu aġġornati online minn fuq mySocialSecurity.

Kif tapplika

Tliet (3) xhur qabel l-età uffiċjali tal-irtirar, id-Dipartiment tas-Sigurtà Soċjali jibgħat ittra ta’ notifka lill-pensjonant prospettiv fejn jintalbu jikkonfermaw dettalji neċessarji, bħal IBAN. L-applikanti għandhom jimlew u jirritornaw il-formola għall-ipproċessar fi żmien sitt xhur mid-data tal-età tal-pensjoni sabiex il-pensjoni tkun tista’ titkompla bil-proċessar. Sottomessjonijiet li jaslu tard jitħallsu mid-data tas-sottomessjoni. 

F’każ li l-persuna tagħżel li tirtira kmieni għall-pensjoni, trid tapplika hija nnifisha, iġifieri bejn l-età ta’ 61 u 64 sena, l-applikant irid japplika minn rajh peress li ma tinħariħx ittra ta’ notifikazzjoni biex japplika. 

Imla u ssottometti l-applikazzjoni online.

Għal aktar informazzjoni dwar pagamenti retrospettivi u inċentivi għall-persuni b’diżabilità li jaslu għall-età tal-pensjoni, ikklikkja hawn.