Regoli tal-UE għall-Koordinazzjoni

X’inhuma r-regoli tal-UE dwar il-Koordinazzjoni tas-Sigurtà Soċjali u dawn kif japplikaw għalija?

L-UE tipprovdi regoli komuni għall-protezzjoni tad-drittijiet tas-sigurtà soċjali ta’ persuni li jiċċaqilqu fl-Ewropa (UE 27 + l-Islanda, Liechtenstein, in-Norveġja u l-Isvizzera). Il-koordinazzjoni tas-sistemi tas-sigurtà soċjali tad-diversi Stati Membri tal-UE, inkluża dik ta’ Malta, issir permezz tar-Regolamenti (KE) Nri. 883/2004 u 987/2009 (ir-Regolament tal-aħħar fih regoli dettaljati għall-implimentazzjoni tar-Regolament preċedenti), li daħlu fis-seħħ fl-1 ta’ Mejju 2010, li ħadu post ir-Regolamenti (KE) Nri 1408/71 u 574/72 rispettivament. Dawn ir-Regolamenti japplikaw għaċ-ċittadini kollha tal-Istati Membri li huma, jew li kienu, koperti mil-leġiżlazzjoni tas-sigurtà soċjali ta’ wieħed mill-Istati Membri, kif ukoll għall-membri tal-familja tagħhom u s-superstiti tagħhom. Dan ifisser li mhux biss l-impjegati, il-persuni li jaħdmu għal rashom, l-impjegati taċ-ċivil, l-istudenti u l-pensjonanti, iżda wkoll il-persuni mhux attivi ser ikunu protetti mir-regoli ta’ koordinazzjoni. Barra minn hekk, ir-Regolament (UE) Nru. 1231/2010 jestendi ulterjorment l-applikazzjoni tar-regoli għal ċittadini ta’ pajjiżi terzi residenti legalment fl-Unjoni. Ir-regoli dwar il-koordinazzjoni tas-sigurtà soċjali ma jissostitwixxux is-sistemi nazzjonali b’waħda Ewropea waħda. Il-pajjiżi kollha huma liberi li jiddeċiedu min għandu jkun assigurat skont il-leġiżlazzjoni tagħhom, liema benefiċċji jingħataw u taħt liema kundizzjonijiet.

L-erba’ prinċipji ewlenin

Il-persuni huma koperti mil-leġiżlazzjoni ta’ pajjiż wieħed meta f’sitwazzjoni transkonfinali u jħallsu biss il-kontribuzzjonijiet f’pajjiż wieħed. Id-deċiżjoni dwar liema pajjiż tapplika tittieħed mill-istituzzjonijiet tas-sigurtà soċjali u mhijiex fakultattiva għall-persuna kkonċernata.
Il-persuni għandhom l-istess drittijiet u obbligi bħaċ-ċittadini tal-pajjiż fejn huma koperti. Dan huwa magħruf bħala l-prinċipju ta’ trattament ugwali jew nondiskriminazzjoni.
Meta tiġi ppreżentata talba għall-benefiċċji, il-perjodi preċedenti ta’ assigurazzjoni, xogħol jew residenza fi Stati Membri oħra jitqiesu jekk ikun meħtieġ.
Jekk persuna tkun intitolata għal benefiċċju fi flus minn pajjiż wieħed, dan jitħallas anki jekk il-persuna tkun qed tgħix f’pajjiż differenti. Dan huwa magħruf bħala l-prinċipju tal-esportazzjoni.

Determinazzjoni ta’ liema skema ta’ sigurtà soċjali tapplika

Ir-regoli dwar il-koordinazzjoni tas-sigurtà soċjali jipprevedu sensiela ta’ regoli ta’ kunflitt li jippermettu lill-istituzzjonijiet tas-sigurtà soċjali jiddeterminaw liema leġiżlazzjoni tal-pajjiż tapplika għal persuni li jinsabu f’sitwazzjoni transkonfinali bejn żewġ pajjiżi (jew aktar). Ladarba jiġi determinat, il-pajjiż li l-leġiżlazzjoni tiegħu hija applikabbli joħroġ id-Dokument Portabbli A1 li jiċċertifika l-pajjiż li huwa kompetenti għall-kopertura tas-sigurtà soċjali tal-persuna.

Self-Assessment għal Min Iħaddem u Persuni li Jaħdmu għal Rashom fl-UE

Din l-Għodda ta’ Stima Personali tgħinek issir taf jekk bħala persuna li tħaddem jew taħdem għal rasha, intix obbligat li tħallas kontribuzzjonijiet tas-sigurtà soċjali f’Malta għall-impjegati tiegħek, jew għalik innifsek, meta taħdem f’sitwazzjoni transkonfinali bejn żewġ (jew aktar) pajjiżi tal-UE.

Benefiċċji koperti mir-regoli tal-UE dwar il-koordinazzjoni tas-sigurtà soċjali

Ladarba tiġi determinata l-leġiżlazzjoni applikabbli, il-persuna assigurata għandha tkun koperta għall-kontinġenzi li ġejjin:

Kull kategorija ta’ benefiċċji tista’ tinkludi benefiċċji differenti li jistgħu jvarjaw minn pajjiż għall-ieħor.l-istess japplika għall-kriterji ta’ eliġibbiltà għal kull benefiċċju li jeħtieġ li jiġi ssodisfat.

Bħala regolamenti, ir-regoli ta’ koordinazzjoni japplikaw direttament fil-pajjiżi kollha tal-UE. Fi kliem ieħor, dawn iridu jiġu osservati mill-awtoritajiet u l-amministrazzjonijiet nazzjonali, l-istituzzjonijiet tas-sigurtà soċjali u l-qrati. Anke meta l-liġijiet nazzjonali jkunu f’kunflitt magħhom, ir-regoli tal-UE għandhom prijorità.

Jista’ jkun diffiċli li jiġi determinat jekk benefiċċju partikolari huwiex kopert mir-regoli ta’ koordinazzjoni jew le. L-istituzzjonijiet tas-sigurtà soċjali fid-diversi Stati Membri tal-UE huma l-punt ta’ referenza f’dawn iċ-ċirkostanzi. Lista ta’ istituzzjonijiet tista’ tinstab permezz tad-direttorju provdut mill-Kummissjoni Ewropea disponibbli fuq: https://ec.europa.eu/social/main.jsp?catId=1028&langId=en.

F’Malta, id-Dipartiment tas-Sigurtà Soċjali huwa l-istituzzjoni kompetenti għad-determinazzjoni tal-leġiżlazzjoni applikabbli u għall-ħlas tal-benefiċċji tas-sigurtà soċjali.

X’mhuwiex kopert?

Ċertu numru ta’ benefiċċji speċjali fi flus li mhumiex ibbażati fuq il-kontribuzzjonijiet (benefiċċji mhux kontributorji) jingħataw biss minn u bi spejjeż tal-istituzzjoni tal-pajjiż tar-residenza. Fil-biċċa l-kbira tal-każijiet dawn il-benefiċċji jitħallsu lil persuni li l-pensjoni jew id-dħul tagħhom huwa inqas minn ċertu livell. Dawn il-benefiċċji ma jitħallsux barra mill-pajjiż. Il-benefiċċji speċjali mhux kontributorji fi flus huma elenkati fl-Anness X tar-Regolament 883/2004.

Fil-każ ta’ Malta, il-benefiċċji li ġejjin ġew iddikjarati bħala Benefiċċji ta’ Flus Speċjali Mhux Kontributorji:

Il-koordinazzjoni tal-UE ma tapplikax għall-assistenza soċjali u medika: dawn il-benefiċċji normalment jingħataw skont il-mezzi tal-persuna.

Il-koordinazzjoni tal-UE ma tapplikax għat-tassazzjoni. Kwistjonijiet relatati ma’ tassazzjoni għandhom jiġu indirrizzati lill-awtoritajiet tat-taxxa fil-pajjiż tar-residenza.

ĊERTIFIKATI A1 U D-DETERMINAZZJONI TAL-LEĠIŻLAZZJONI APPLIKABBLI DWAR IS-SIGURTÀ SOĊJALI

Il-prinċipju ġenerali huwa li ħaddiem għandu jkun soġġett għal-leġiżlazzjoni ta’ Stat Membru wieħed biss fi kwalunkwe ħin. Il-ħaddiema ġeneralment ikunu soġġetti għal-leġiżlazzjoni tal-istat li jkunu qed jaħdmu fih, irrispettivament mill-post ta’ residenza tagħhom jew mill-post ta’ fejn hu stabbilit min iħaddem. It-Titolu II tar-Regolament (KE) 883/2004 fih regoli partikolari, bħar-regoli għall-impjegati taċ-ċivil, li huma soġġetti għal-leġiżlazzjoni tal-Istat Membru fejn hi stabbilita l-amministrazzjoni li timpjegahom, jew għal persuni li huma impjegati jew jaħdmu għal rashom f’diversi Stati Membri.

Persuni li normalment huma impjegati f’żewġ Stati Membri jew aktar huma soġġetti għal-leġislazzjoni tal-Istat Membru ta’ residenza jekk iwettqu parti sostanzjali tal-attività tagħhom f’dak l-Istat Membru. Jekk ma jwettqux parti sostanzjali mill-attivitajiet tagħhom fl-Istat tar-residenza, huma soġġetti għal-leġislazzjoni tal-Istat Membru fejn jinsab l-uffiċċju rreġistrat jew il-post tan-negozju ta’ min iħaddimhom. Madankollu, fil-każ ta’ impjieg indipendenti, persuna hija soġġetta għal-leġiżlazzjoni tal-Istat tar-residenza, jekk il-persuna twettaq parti sostanzjali tal-attività f’dak l-Istat Membru. Jekk il-persuna ma tirrisjedix f’wieħed mill-Istati Membri fejn issir parti sostanzjali tal-attività, il-persuna hija soġġetta għal-leġislazzjoni tal-Istat Membru li fih jinsab iċ-ċentru ta’ interess tal-attivitajiet.

Jeżistu arranġamenti speċjali biex jipprovdu għall-impjegati stazzjonati temporanjament minn min iħaddimhom biex jaħdmu fi Stat Membru ieħor. Jekk it-tul ta’ żmien antiċipat tal-istazzjonar ma jaqbiżx l-24 xahar u l-impjegat ma jkunx qed jissostitwixxi lil xi ħadd li l-attivita’ tiegħu tkun intemmet, il-ħaddiem jista’ jibqa’ assigurat fl-iskema tal-istat ta’ oriġini tiegħu. Jekk ix-xogħol mhux mistenni jdum għal aktar minn 24 xahar, l-Istati Membri involuti jistgħu jidħlu fi ftehim komuni (skont l-Artikolu 16 tar-Regolament 883/2004), li permezz tiegħu l-persuna tista’ tibqa’ assigurata fl-Istat li qed jibgħat lill-ħaddiem. Dan il-ftehim għandu jsir fl-interess ta’ ċerti kategoriji ta’ persuni u professjonijiet.

Aktar informazzjoni dwar il-prattika tad-determinazzjoni tal-leġiżlazzjoni applikabbli tista’ tinstab fil-Gwida Prattika: Il-leġiżlazzjoni li tapplika għall-ħaddiema fl-Unjoni Ewropea (UE), fiż-Żona Ekonomika Ewropea (EUE) u fl-Isvizzera.

Iċ-ċertifikat A1

Id-dokument portabbli (PD) A1 jiċċertifika liema leġiżlazzjoni tas-sigurtà soċjali tapplika għad-detentur tal-formola. Dan ġeneralment ikun meħtieġ f’sitwazzjonijiet fejn persuna impjegata jew li taħdem għal rasha jkollha konnessjoni ma’ aktar minn pajjiż wieħed tal-UE permezz tal-attività tax-xogħol. Skont ir-regoli tal-UE persuna tkun soġġetta biss għal-leġiżlazzjoni ta’ pajjiż wieħed fi kwalunkwe ħin. L-A1 jinħareġ mill-pajjiż li l-persuna hija soġġetta għal-leġiżlazzjoni tiegħu u, min-naħa tiegħu, jikkonferma wkoll li l-leġiżlazzjoni ta’ kwalunkwe pajjiż ieħor li miegħu hija konnessa l-persuna mhijiex applikabbli. Fi kliem ieħor, il-ħaddiem mhu se jkollu l-ebda obbligu li jħallas il-kontribuzzjonijiet tas-sigurtà soċjali (inkluża l-assigurazzjoni tas-saħħa) fil-pajjiżi l-oħra involuti. L-A1 jibqa’ validu sad-data ta’ skadenza, indikata fuqu jew sakemm jiġi rtirat mill-istituzzjoni li tkun ħarġitu.

Fejn u meta għandek tikseb ċertifikat A1?

Fil-każ ta’ persuna impjegata li tmur taħdem temporanjament f’pajjiż ieħor tal-UE, min iħaddem normalment japplika għall-A1 mad-Dipartiment tas-Sigurtà Soċjali, f’isem l-impjegat. Min iħaddem għandu japplika wkoll għal dokument A1 f’isem l-impjegati tiegħu meta dawn normalment iwettqu attivitajiet f’aktar minn pajjiż wieħed tal-UE. Il-persuni li jaħdmu għal rashom għandhom japplikaw huma stess. Applikazzjoni għandha tiġi sottomessa permezz tal-applikazzjoni online għal dokument A1. Kull meta jkun possibbli, l-applikazzjoni għandha ssir qabel ma tibda l-attività fil-pajjiż l-ieħor.

Jekk, min-naħa l-oħra, persuna tkun assigurata f’pajjiż ieħor tal-UE u se taħdem temporanjament f’Malta, dokument A1 għandu jinkiseb mill-istituzzjoni tas-sigurtà soċjali fejn il-persuna assigurata u tippreżentah lil min iħaddem f’Malta.

Użu taċ-ċertifikat A1

L-A1 għandu jinżamm disponibbli biex jiġi ppreżentat, mill-ħaddiem u minn min iħaddem, lill-istituzzjoni fil-pajjiż fejn titwettaq l-attività, biex tiġi kkonfermata l-pożizzjoni tas-sigurtà soċjali u biex jiġi indikat f’liema pajjiż għandhom jitħallsu l-kontribuzzjonijiet tas-sigurtà.

Liema sitwazzjonijiet tkopri l-formola A1?

Meta tintbagħat minn min iħaddmek biex taħdem temporanjament f’pajjiż ieħor tal-UE f’ismu, għal perjodu massimu ta’ 24 xahar. Dan huwa magħruf bħala “stazzjonar”.
- Il-kundizzjonijiet għall-istazzjonar huma spjegati fil-Gwida Prattika dwar il-leġiżlazzjoni applikabbli.
- Min iħaddem huwa meħtieġ li jimla l-kwestjonarju ta’ min iħaddem. Jekk il-kundizzjonijiet kollha għall-istazzjonar jiġu ssodisfati, il-formola A1 tinħareġ awtomatikament u tikkonferma li, se tibqa’ soġġett għal-leġiżlazzjoni ta’ Malta.
Meta normalment taħdem għal rasek f’pajjiż tal-UE u tmur twettaq attività simili f’pajjiż ieħor għal perjodu massimu ta’ 24 xahar.
- Il-persuni li jaħdmu għal rashom huma meħtieġa jimlew il-kwestjonarju dwar l-istazzjonar. Jekk il-kundizzjonijiet kollha għall-istazzjonar jiġu ssodisfati, il-formola A1 tikkonferma li se tibqa’ soġġett għal-leġiżlazzjoni ta’ Malta.
Meta tkun impjegat jew taħdem għal rasek abbord bastiment li jtajjar il-bandiera ta’ Malta
- Sakemm ma tgħixx fl-istess pajjiż fejn jinsab min iħaddmek, il-formola A1 tikkonferma li se tkun suġġett għal-leġiżlazzjoni ta’ Malta.
Meta tkun qed twettaq attività bħala ekwipaġġ tat-titjira jew tal-kabina ta’ inġenju tal-ajru li l-bażi residenzjali tiegħu tkun f’Malta
- Meta l-bażi residenzjali magħżula skont l-Anness III tar-Regolament 3922/91 tkun Malta, il-formola A1 tikkonferma li se tkun suġġett għal-leġiżlazzjoni ta’ Malta.
Meta normalment tkun impjegat f’aktar minn pajjiż wieħed tal-UE fl-istess ħin jew f’alternazzjoni.
- Skont is-sitwazzjoni tiegħek, tista’ tkun suġġett għal-leġiżlazzjoni jew tal-pajjiż ta’ residenza tiegħek jew tal-pajjiż li fih jinsab l-uffiċċju reġistrat jew il-post tan-negozju ta’ min iħaddmek.
- F’dan il-każ, id-determinazzjoni tal-leġiżlazzjoni applikabbli ssir mill-istituzzjoni tas-sigurtà soċjali fl-Istat Membru ta’ residenza.
- Meta Malta tkun l-Istat Membru ta’ residenza responsabbli għat-twettiq tad-determinazzjoni tal-leġiżlazzjoni applikabbli, min iħaddem huwa meħtieġ jimla l-kwestjonarju dwar l-impjiegi.
Meta normalment taħdem għal rasek f’aktar minn pajjiż wieħed tal-UE fl-istess ħin jew f’alternazzjoni.
- Skont is-sitwazzjoni tiegħek, tista’ tkun suġġett għal-leġiżlazzjoni jew tal-pajjiż ta’ residenza tiegħek jew tal-pajjiż fejn jinsab iċ-ċentru ta’ interess tiegħek.
Meta twettaq attività kemm bħala impjegat kif ukoll bħala persuna li taħdem għal rasha f’pajjiżi differenti tal-UE.
- F’din is-sitwazzjoni, il-formola A1 tikkonferma li l-leġiżlazzjoni tal-pajjiż tal-attivitajiet impjegati tiegħek tipprevali.
Meta int impjegat taċ-ċivil Malti li qed twettaq attivitajiet f’aktar minn pajjiż wieħed tal-UE.
- F’din is-sitwazzjoni, il-formola A1 tikkonferma li inti tibqa’ taħt il-leġiżlazzjoni ta’ Malta.
Meta jkun fl-interess tiegħek li tidderoga minn kwalunkwe waħda mir-regoli ta’ hawn fuq,
- Żewġ Stati tal-UE jew aktar jistgħu, fuq talba ta’ min iħaddmek, jaqblu li inti tkun soġġett għal-leġiżlazzjoni ta’ stat differenti minn dak previst mir-regoli normali. Il-formola A1 tikkonferma għal liema leġiżlazzjoni inti suġġett.

Assigurazzjoni għall-baħħara li jaħdmu abbord bastimenti li jtajru l-bandiera Maltija

Skont l-Artikolu 11(4) tar-Regolament 883/2004, il-persuni impjegati jew li jaħdmu għal rashom abbord bastiment li jtajjar il-bandiera ta’ Malta għandhom ikunu soġġetti għall-ħlas tal-kontribuzzjonijiet tas-sigurtà soċjali tagħhom fl-iskema tas-sigurtà soċjali Maltija. L-unika eċċezzjoni għal din ir-regola hija applikata f’każ li min iħaddem ikun stabbilit fl-istess pajjiż ta’ residenza tal-impjegat. Ta’ min jinnota li l-Artikolu 11(4) japplika biss meta l-bastiment jopera fl-ibħra internazzjonali. Bastimenti li joperaw f’passaġġi fuq l-ilma interni (bħal fuq dgħajjes tax-xmajjar) huma ttrattati skont l-Artikolu 13 tar-Regolament 883/2004 li jittratta persuni li jaħdmu f’żewġ Stati Membri jew aktar.

Id-dispożizzjonijiet tal-Artikolu 11(4) japplikaw biss għaċ-ċittadini tal-UE u għaċ-ċittadini ta’ Pajjiżi Terzi residenti legalment fl-UE. Persuni oħra li jaħdmu abbord bastiment li jtajjar il-bandiera Maltija mhumiex soġġetti għall-istess dispożizzjonijiet. Dawn il-każijiet għandhom jiġu ttrattati skont l-Att dwar is-Sigurtà Soċjali ta’ Malta (il-Kapitolu 318 tal-Liġijiet ta’ Malta) li jeżenta mill-ħlas ta’ persuni tas-sigurtà soċjali li normalment mhumiex residenti f’Malta u li min iħaddimhom m’għandux post tan-negozju f’Malta (l-Artikolu 1 tal-Parti I tal-Ewwel Skeda).

Iċ-ċittadini tar-Renju Unit li jaħdmu fuq bastiment li jtajjar il-bandiera Maltija, għandhom jiġu ttrattati f’konformità mad-dispożizzjonijiet tal-Ftehim dwar il-Ħruġ jekk l-attività tagħhom tkun bdiet qabel il^- 31 ta’ Diċembru 2020. Għaċ-ċittadini tar-Renju Unit li l-attività tagħhom abbord bastiment li jtajjar il-bandiera Maltija bdiet wara l-1 ta’ Jannar 2021, għandhom jiġu ttrattati f’konformità mad-dispożizzjonijiet tal-Protokoll bejn l-UE u r-Renju Unit. Fiż-żewġ xenarji, japplika l-prinċipju tal-Istat tal-bandiera.

Fid-dawl ta’ dan ta’ hawn fuq, jista’ jirriżulta li min iħaddem, għalkemm stabbilit barra minn Malta, ikun obbligat li jħallas il-pagamenti tas-sigurtà soċjali fl-iskema Maltija f’isem dawk l-impjegati li ġew iddeterminati li huma suġġetti għall-assigurazzjoni f’Malta. F’dan il-każ, min iħaddem għandu jagħmel arranġamenti mal-uffiċċju tal-Kummissarju tat-Taxxi Interni sabiex iwettaq il-ħlasijiet.

Assigurazzjoni fl-iskema tas-sigurtà soċjali Maltija

Meta r-riżultat tal-proċess għad-determinazzjoni tal-leġiżlazzjoni applikabbli, jindika li l-iskema tas-sigurtà soċjali Maltija tapplika, il-ħaddiem huwa dirett biex japplika għal numru tas-sigurtà soċjali. Applikazzjoni onlajn hija disponibbli hawnhekk.

Benefiċċji pprovduti taħt l-iskema tas-sigurtà soċjali Maltija

Ladarba jkunu assigurati fl-iskema Maltija, iċ-ċittadini tal-UE residenti fl-UE, iċ-ċittadini tar-Renju Unit koperti mill-Ftehim dwar il-Ħruġ, u ċ-Ċittadini ta’ Pajjiżi Terzi residenti legalment fl-UE (ħlief għaċ-ċittadini tar-Renju Unit koperti mill-Protokoll), għandhom ikunu koperti kontra l-kontinġenzi li ġejjin:

Benefiċċji tal-mard, benefiċċji ta’ maternità u benefiċċji ekwivalenti ta’ paternità
Pensjonijiet tax-xjuħija, benefiċċji tas-superstiti, u tal-invalidità
- Pensjonijiet tax-Xjuħija
- Benefiċċji tas-Superstiti
  - Pensjoni tas-Superstiti
  - Pensjoni tar-Romol
- Benefiċċji ta’ l-invalidità
Benefiċċji tal-qgħad
- Benefiċċju tal-Qgħad
- Trasferiment ta’ Benefiċċju tal-Qgħad fl-UE
Benefiċċji tal-familja
- Allowance għat-Tfal (Rata Flat jew Ibbażat fuq id-dħul)
- L-Allowance tat-Tfal b’Diżabbiltà
- L-Allowance tat-Tfal fill-Kura
- Benefiċċju ta’ Waqt l-Impjieg
- L-Allowance ta’ l-Iltiema
- L-Allowance Supplimentari tal-Iltiema
Benefiċċji fir-rigward ta’ inċidenti fuq il-post tax-xogħol u mard ikkaġunat mix-xogħol

Ċittadini tar-Renju Unit residenti fir-Renju Unit li bdew l-attività transfruntiera tagħhom f’Malta wara l-¹ ta’ Jannar 2021 għandhom ikunu koperti kontra l-istess kontinġenzi ħlief għal dawn li ġejjin:

Benefiċċji tal-familja — l-intitolament jeżisti biss jekk il-familja kollha tirrisjedi f’Malta jew fl-UE.
Benefiċċji tal-qgħad — l-intitolament jeżisti biss għal Benefiċċju tal-Qgħad meta l-ħaddiem jitlob benefiċċji waqt li jkun residenti f’Malta.
Benefiċċji tal-invalidità — id-dritt huwa ekwivalenti għall-perjodi ta’ impjieg f’Malta biss. Il-benefiċċji tal-invalidità tar-Renju Unit mhumiex pagabbli barra mir-Renju Unit.

BENEFIĊĊJI KOPERTI

Benefiċċji marbutin mal-Mard, mal-Maternità u Benefiċċji Ekwivalenti tal-Paternità

Pensjonijiet tal-Età, tas-Superstiti, u tal-Invalidità

Benefiċċji tal-Qgħad

Benefiċċji tal-Familja

Inċidenti fuq il-Post tax-Xogħol u Mard Okkupazzjonali

LINKS UTILI

Il-moviment fi ħdan l-Ewropa: Il-Vidjos ta’ Koordinazzjoni tas-Sigurtà Soċjali tal-UE

(vidjos jidhru l-aħjar jekk tużu Google Chrome)

Informazzjoni Ġenerali - Liema pajjiż huwa responsabbli għad-drittijiet tiegħek tas-sigurtà soċjali?

Ħaddiema tal-Fruntiera - Liema pajjiż huwa responsabbli għad-drittijiet tiegħek tas-sigurtà soċjali?

Pensjonijiet - Liema pajjiż se jħallas il-pensjoni tiegħi tal-Irtirar?

Qgħad - Kif ic-ċaqliq fl-UE jaffettwa d-dritt tiegħi għall-benefiċċji tal-qgħad?

Koordinazzjoni tas-Sigurtà Soċjali tal-UE (Cross-Border)

Ċertifikat ta’ Assigurazzjoni/Perjodu ta’ Impieg f’Pajjiż ieħor tal-UE (Formola U1) – ara l-informazzjoni
Dritt li Tibqa’ Inxurjat f’Malta (Formola A1) – ara l-informazzjoni

TELEWORK TRANSKONFINALI

L-informazzjoni ta' hawn taħt tipprovdi ħarsa ġenerali lejn il-proċeduri amministrattivi meħtieġa għall-impjegaturi u l-impjegati meta jwettqu attività ta' impjieg transkonfinali permezz tat-telework.

It-telework transkonfinali huwa attività li tista' titwettaq minn kwalunkwe post u li tista' titwettaq fil-bini jew fil-post tan-negozju tal-impjegatur u;

1. titwettaq fi Stat Membru tal-UE jew fi Stati Membri differenti minn dak li fih jinsab il-post ta' min iħaddem jew il-post tan-negozju u

2. hija bbażata fuq it-teknoloġija tal-informazzjoni biex tibqa' konnessa mal-ambjent tax-xogħol ta' min iħaddem kif ukoll mal-partijiet interessati/il-klijenti sabiex twettaq il-kompiti tal-impjegat assenjati mill-impjegatur.

Huwa importanti wkoll li jiġi enfasizzat li t-telework transkonfinali jsir bi qbil bejn l-impjegatur u l-impjegat, f'konformità mal-liġi nazzjonali.

Mill-1 ta' Lulju 2023, Malta saret firmatarja tal-ftehim dwar it-telework transkonfinali. Dan il-ftehim jipprovdi li impjegat li jaħdem permezz ta' telework għal inqas minn 50 % tal-ħin tax-xogħol tiegħu fi Stat Membru tal-ftehim, għal kumpanija stabbilita fi Stat Membru ieħor tal-ftehim, jista' jkompli jibbenefika mill-kopertura tas-sigurtà soċjali tal-Istat Membru fejn huwa stabbilit l-impjegatur. Meta l-impjegat jaħdem għal aktar minn 50 % tal-ħin tax-xogħol tiegħu fl-Istat Membru ta' residenza, huwa għandu jsir soġġett għall-iskema tas-sigurtà soċjali ta' dak il-pajjiż.

Dawn il-linji gwida, imfassla b'kollaborazzjoni ma' Jobsplus, jipprovdu informazzjoni ċara u konċiża lil min iħaddem u lill-impjegati, kemm mill-perspettiva tas-sigurtà soċjali, kif ukoll tas-servizzi tal-impjiegi.

Xenarju	Bażi Legali	Affiljazzjoni tas-Sigurtà Soċjali	Liċenzja tal-Impjieg	Formola ta' Bidu ta' Impjieg tal-Jobsplus
Persuna* impjegata minn impjegatur ibbażat f'Malta u li twettaq 100 % tal-ħin tax-xogħol mill-pajjiż ta' residenza tagħha (fl-UE/ŻEE/Svizzera).	Il-persuna hija suġġetta għas-sistema tas-sigurtà soċjali tal-istat ta' residenza tagħha, li huwa wkoll l-istat ta' impjieg skont it-tifsira tal-Artikolu 11(3)(a) tar-Regolament (KE) Nru 883/2004.	L-impjegatur għandu jagħmel arranġamenti mal-istituzzjoni tas-sigurtà soċjali tal-pajjiż ta' residenza tal-impjegat biex jagħmel pagamenti ta' kontribuzzjonijiet f'dak il-pajjiż.	Mhux meħtieġa.	Meħtieġa għaċ-ċittadini tal-UE u għall-persuni li għandhom id-dritt awtomatiku li jgħixu u jaħdmu f'Malta. Mhux meħtieġa għal Ċittadini ta' Pajjiżi Terzi li jirrisjedu f'pajjiż ieħor.
Persuna* impjegata minn impjegatur ibbażat f'Malta u residenti f'Malta li, bi ftehim mal-impjegatur, se taħdem b' mod eċċezzjonali mid-dar jew minn post ieħor esklussivament għal perjodu ta' żmien limitat mill-pajjiż ta' residenza tiegħu jew tagħha (fl-UE/ŻEE/Svizzera).	Il-persuna tibqa' suġġetta għall-iskema tas-sigurtà soċjali ta' Malta skont l-Artikolu 12 tar-Regolament (KE) Nru 883/2004.	L-impjegatur għandu jitlob ċertifikat A1 mid-Dipartiment tas-Sigurtà Soċjali, u jinkludi kopja tal-ftehim milħuq mal-impjegat. Ladarba jinħareġ l-A1, min iħaddem jista' jkompli jagħmel il-ħlasijiet tal-kontribuzzjonijiet fl-iskema Maltija.	Meħtieġa għal persuni li mhumiex ċittadini tal-UE u/jew persuni li m'għandhomx id-dritt awtomatiku li jgħixu u jaħdmu f'Malta.	Meħtieġa għall-persuni kollha.
Persuna* impjegata minn impjegatur ibbażat f'Malta u li regolarment twettaq mhux aktar minn 25 % tal-ħin tax-xogħol mid-dar (fl-UE/fiż-ŻEE/fl-Iżvizzera) u l-bqija tax-xogħol isir fuq il-post milll-uffiċċju tal-impjegatur f'Malta.	Il-persuna tibqa' suġġetta għall-iskema tas-sigurtà soċjali ta' Malta skont l-Artikolu 13(1) tar-Regolament (KE) Nru 883/2004.	Min iħaddem jitlob ċertifikat A1 mid-Dipartiment tas-Sigurtà Soċjali, u jinkludi kopja tal-ftehim milħuq mal-impjegat. Ladarba jinħareġ l-A1, min iħaddem jista' jkompli jagħmel il-ħlasijiet tal-kontribuzzjonijiet fl-iskema Maltija.	Meħtieġa għal persuni li mhumiex ċittadini tal-UE u/jew persuni li m'għandhomx id-dritt awtomatiku li jgħixu u jaħdmu f'Malta.	Meħtieġa għall-persuni kollha.
Persuna* impjegata minn impjegatur ibbażat f'Malta u li regolarment twettaq mhux aktar minn 50 % tal-ħin tax-xogħol mid-dar (fl-UE/fiż-ŻEE/fl-Iżvizzera) u l-bqija tax-xogħol isir fuq il-post mill-uffiċċju tal-impjegtur f'Malta. F'dan il-każ, il-pajjiż ta' residenza tal-ħaddiem għandu neċessarjament ikun firmatarju tal-qafas ta' ftehim.	Il-persuna tibqa' suġġetta għall-iskema tas-sigurtà soċjali ta' Malta skont l-Artikolu 16 tar-Regolament (KE) Nru 883/2004.	Min iħaddem jitlob ċertifikat A1 mid-Dipartiment tas-Sigurtà Soċjali, u jinkludi kopja tal-ftehim milħuq mal-impjegat. Ladarba jinħareġ l-A1, min iħaddem jista' jkompli jagħmel il-ħlasijiet tal-kontribuzzjonijiet fl-iskema Maltija.	Meħtieġa għal persuni li mhumiex ċittadini tal-UE u/jew persuni li m'għandhomx id-dritt awtomatiku li jgħixu u jaħdmu f'Malta.	Meħtieġa għall-persuni kollha.
Ċittadin tal-UE/ŻEE/Svizzeru impjegat minn impjegatur ibbażat f'Malta u li jwettaq 100 % tal-ħin tax-xogħol mill-pajjiż tar-residenza tiegħu jew tagħha barra mill-UE.	Il-persuna mhix suġġetta għas-sistema tas-sigurtà soċjali Maltija f'termini tal-Att dwar is-Sigurtà Soċjali (Kapitolu 318 tal-Liġijiet ta' Malta).	Min iħaddem u l-impjegat għandhom jilħqu ftehim dwar kif għandhom jiġu effettwati l-pagamenti tas-sigurtà soċjali fil-pajjiż ta' residenza.	Mhux Meħtieġa.	Meħtieġa għaċ-ċittadini tal-UE u għall-persuni li għandhom id-dritt awtomatiku li jgħixu u jaħdmu f'Malta.
Ċittadin ta' Pajjiż Terz impjegat minn impjegatur ibbażat f'Malta u li jwettaq 100 % tal-ħin tax-xogħol mill-pajjiż ta' residenza tiegħu jew tagħha barra mill-UE.	Il-persuna mhix soġġetta għas-sistema tas-sigurtà soċjali Maltija f'termini tal-Att dwar is-Sigurtà Soċjali (Kapitolu 318 tal-Liġijiet ta' Malta).	Min iħaddem u l-impjegat għandhom jilħqu ftehim dwar kif għandhom jiġu effettwati l-pagamenti tas-sigurtà soċjali fil-pajjiż ta' residenza.	Mhux Meħtieġa.	Mhux Meħtieġa.

*Definit bħala ċittadin tal-UE jew ċittadin ta' Pajjiż Terz residenti legalment fl-UE kif ukoll ċittadin tar-Renju Unit kopert mill-Ftehim dwar il-Ħruġ (residenti legalment fl-UE qabel l-1 ta' Jannar 2021).